佛教飾物凸顯個人風格

　　一向形象自我叛逆的年輕歌手謝霆鋒，原來亦喜歡佩戴富宗教色彩的佛像鏈墜，凸顯其我行我素風格的同時，更引起不少Fans爭相仿效。其實泰國守護佛像多不勝數，佩戴在身既能帶來好運，又可當作美觀的裝飾，今次就為大家介紹一些較具特色的佛墜及佛教飾物，看看邊款合心水！

文：許穗齡　攝：林柏鈞

四面佛守護物主

　　歌星謝霆鋒身上戴住的，正係泰國四面佛像鏈墜。有人話四面佛掌管生老病死，亦有人話係酒色財氣，其實四面佛係一位守護神，會保祐並祝福物主。風水佛學師馬師傅話四面佛應該四面通，即放係四方無阻隔的地方，戴在身唔十分正統，不過護身物總係跟身的好，感覺好似真係無時無刻貼身保護自己咁。

必達佛心想事成

　　盤膝而坐、雙手掩面的必達佛唔係無眼睇，而係佢用心去感受。每個人總有夢想，必達佛就好似會賜你三個願望的燈神一樣，可以幫助物主完成心願，但當然唔代表不勞而獲，物主都必須要有一定的付出先可以心想事成

四方佛大食四方

　　四方佛適合一些食四方飯的人佩戴，例如從事公共事業，好似藝人、記者等等。佛像顏色灰暗，有傳係用得道和尚的骨灰做成，亦有話係用和尚食剩的食物，曬乾後再磨成灰做成，所以間接吸收到靈氣。

招財佛招聚財氣

　　睇見呢個佛像伸出一隻招財手，都應該估到佢同財運有關。招財佛主財氣，戴住佢可以旺財，最適合Ｄ一心想發達，或者自己開公司做生意的人佩戴。

佛珠鏈增運辟邪

　　好多人都會鍾意戴水晶佛珠鏈，用來護身或當作首飾，但大家要留意有葫蘆的才是真正有護身作用的佛珠鏈，而無的話就只是普通飾物。佛珠鏈能增運辟邪，而且開過光（即念過經）功效就更好。

生肖水晶平安佛牌

　　原來唔同生肖的人，係受唔同的菩薩保祐。呢個就係保守龍、蛇年生肖的人是普賢菩薩水晶佛牌。水晶佛牌上刻有守護菩薩的肖像，而且佛牌晶瑩通透，戴起來同一般水晶飾物一樣咁美觀。

六字大明咒戒指

　　六字大明咒即係觀音咒，全文只有六個字「唵嘛呢吧咩吽」，係一道保平安的咒文，只要在危難之時心內念一次，就可以幫你脫離苦難，而呢兩隻鍍金六字大明戒指上面，正刻有這六字梵文，具有護身功效。